رَجَبُ الْمُرَجَّب کی فضیلت وعظمت Rajab Ul Murajjab Ki Fazilat wa Azmat

رَجَبُ الْمُرَجَّب

جنّت کی نہر

حضرتِ سَیِّدُنا اَنَس بن مالِک    رَضِیَ  اللہ   تَعَالٰی عَنْہُ   سے روایت ہے، کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَر   صَلَّی  اللہ   تَعَالٰی عَلَیْہِ وَاٰلِہٖ وَسَلَّمَ  نے ارشاد فرمایا  :    ’’جنّت میں ایک نَہَر ہے  جسے ’’رَجَب‘‘ کہا جا تا ہے جو دودھ سے زیادہ سفید اور شہد سے زیادہ میٹھی ہے تو جو کوئی رَجَب کا ایک روزہ رکھے تو اللّٰہ   عَزَّ وَجَلَّ    اسے اس نَہَر سے سیرَ اب کریگا۔‘‘ (شُعَبُ الْاِیْمَان ج۳ص۳۶۷حدیث۳۸۰۰)

 جنّت کامَحَلّ

حضرتِ سَیِّدُنا ابوقِلابہ     رَضِیَ  اللہ   تَعَالٰی عَنْہُ   فرماتے ہیں رَجَب کے روزہ داروں کیلئے جنَّت میں ایک مَحَل ہے۔‘‘

 (شُعَبُ الْاِیْمَان ج۳ص۳۶۸حدیث۳۸۰۲) 

ستائیسویں شب کی فضیلت 

رَجَب میں ایک رات ہے کہ اس میں نیک عمل کرنے والے کو سو برس

 کی نیکیوں کا ثواب ہے اور وہ رجب کی ستائیسویں شَب ہے ۔جو اس میں بارہ رکعت اس طرح پڑھے کہ ہر رکعت میں سورۂ فاتِحہ اورکوئی سی ایک سُورت اور ہر دو رکْعت پر اَلتَّحِیّاتُ پڑھے اور بارہ پوری ہونے پر سلام پھیرے ، اس کے بعد۱۰۰بار یہ پڑھے  :     سُبْحٰنَ اللّٰہِ وَالْحَمْدُلِلّٰہِ وَلَآاِلٰہَ اِلَّااللّٰہُ  وَاللّٰہُ اَکْبَر، اِستِغفار سوبار، دُرُودشریف سوبارپڑھے اوراپنی دنیاوآخِرت سے جس چیز کی چاہے دعا مانگے اور صبح کو روزہ رکھے تو اللّٰہ  تَعَالٰی  اس کی سب دُعائیں قَبو ل فرمائے سوائے اُس دُعا کے جوگُناہ کے لئے ہو۔   (شُعَبُ الْاِیْمَان ج۳ص۳۷۴حدیث۳۸۱۲)

ستائیسویں رجب کے روزے کی فضیلت

میرے آقا اعلیٰ حضرت، اِمامِ اَہلسنّت، ولیٔ نِعمت، عظیمُ البَرَکت ، عظیمُ المَرْتَبت، پروانۂِ شمعِ رِسالت، مُجَدِّدِ دین ومِلَّت، حامیِٔ سنّت، ماحِیِٔ بِدعت، عالِمِ شَرِیْعَت، پیرِطریقت، باعثِ خَیْر وبَرَکت، حضرتِ علّامہ مولیٰنا الحاج الحافِظ القاری شاہ امام اَحمد رضا خان  علیہ رحمۃُ الرَّحمٰن فرماتے ہیں کہ’’  فوائد ہناد‘‘ میں حضرت ِسیِّدُنا انس    رَضِیَ  اللہ   تَعَالٰی عَنْہُ   سے مَروی ہے کہ نبیِّ کریم، رئُ وْفٌ رَّحیمعلیہ الصلوٰۃ والسلام نے ارشاد فرمایا  :   ستائیس رجَبکو مجھے نُبُوَّت عطا ہوئی جو اِس دن کا روزہ رکھے اور اِفطار کے وَقْت دُعا کرے دس برس کے گناہوں کا کَفّارہ ہو۔‘‘(فتاویٰ رضویہ مُخَرَّجہ ج۱۰ص۶۴۸)

سوسال کے روزے کا ثواب

حضرت ِسیِّدُناسلمان فارسی    رَضِیَ  اللہ   تَعَالٰی عَنْہُ   سے مروی ہے ، اللّٰہ کے محبوب ، دانائے غُیُوب، مُنَزَّہٌ عَنِ الْعُیُوب  عَزَّ وَجَلَّ     و  صَلَّی  اللہ    تَعَالٰی عَلَیْہِ وَاٰلِہٖ وَسَلَّمَ   کا فرمانِ ذِیشان ہے  :   ’’رجَب میں ایک دن اور رات ہے جو اُس دن روزہ رکھے اور رات کو قِیام (عبادت )کرے تو گویا اُس نے سو سال کے روزے رکھے اور یہ رَجَب کی ستائیس تاریخ ہے۔اِسی دن محمّد  صَلَّی  اللہ    تَعَالٰی عَلَیْہِ وَاٰلِہٖ وَسَلَّمَ   کو اللّٰہ   عَزَّ وَجَلَّ   نے مَبْعُوث (مَبْ۔عُوْ۔ث)فرمایا۔‘‘ (شُعَبُ الْاِیْمَان ج۳ص۳۷۴حدیث ۳۸۱۱)

 رَجَبُ الْمُرَجَّب کی فضیلت وعظمت Rajab Ul Murajjab Ki Fazilat wa Azmat