’وَاحِد‘‘ کے چار حروف کی نسبت سے کلمہ طیّبہ کے4 فضائل
(1)خوش نصیب کون
حضرتِ سیِّدُنا ابوہریرہ رَضِیَ اللہ تَعَالٰی عَنْہُ سے روایت ہے انہوں نے عرض کی : یارسول اللہ ! عَزَّ وَجَلَّ و صَلَّی اللہ تَعَالٰی عَلَیْہِ وَاٰلِہٖ وَسَلَّمَ قیامت کے دن آپ صَلَّی اللہ تَعَالٰی عَلَیْہِ وَاٰلِہٖ وَسَلَّمَ کی شفاعت سے بہرہ مند ہونے والے خوش نصیب لوگ کون ہونگے؟ فرمایا : اے ابوہریرہ! میرا گمان یہی تھا کہ تم سے پہلے مجھ سے یہ بات کوئی نہ پوچھے گا کیونکہ میں حدیث سننے کے معاملہ میں تمہاری حرص کو جانتاہوں ، قیامت کے دن میری شفاعت پانے والا خوش نصیب وہ ہوگا جو صدق دل سے’’لَا اِلٰہَ اِلَّا اللّٰہُ ‘‘ کہے گا۔ (صَحِیحُ البُخارِیّ ج۱ ص۵۳ حدیث۹۹)
(2)افضل ذ کر ودعا
حضرتِ سیِّدُناجابر رَضِیَ اللہ تَعَالٰی عَنْہُ فرماتے ہیں : میں نے شہنشاہِ مدینہ، قرارِ قلب و سینہ، صاحبِ معطر پسینہ، باعثِ نُزولِ سکینہ، فیض گنجینہ صَلَّی اللہ تَعَالٰی عَلَیْہِ وَاٰلِہٖ وَسَلَّمَ کوفرماتے ہوئے سنا : سب سے افضل ذکر’’لَآ اِلٰہَ اِلَّا اللّٰہُ‘‘ہے اور سب سے
افضل دعا ’’اَلْحَمْدُ لِلّٰہِ‘‘ہے۔ (سُنَنُ ابْن ماجہ ج۴ ص ۲۴۸حدیث۳۸۰۰)
(3)آسمانوں کے دروازے کھل جاتے ہیں
حضرتِ سیِّدُنا ابو ہریرہ رَضِیَ اللہ تَعَالٰی عَنْہُ سے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَر صَلَّی اللہ تَعَالٰی عَلَیْہِ وَاٰلِہٖ وَسَلَّمَ نے ارشاد فرمایا : ’’جس بندے نے اخلاص کے ساتھ ’’ لَا اِلٰہَ اِلَّااللّٰہُ ‘‘ کہا تو آسمانوں کے دروازے کھول دیئے جاتے ہیں ، یہاں تک کہ وہ عرش تک پہنچ جاتا ہے جبکہ کبیرہ گناہوں سے بچتا رہے۔
(سُنَنُ التِّرْمِذِیّ ج۵ ص۳۴۰ حدیث۳۶۰۱)
(4) تجد یدایمان
حضرت سیِّدُنا ابوہریرہ رَضِیَ اللہ تَعَالٰی عَنْہُ سے روایت ہے کہ سیِّدُ المُبلِّغین، رَحْمَۃ لِّلْعٰلَمِیْن صَلَّی اللہ تَعَالٰی عَلَیْہِ وَاٰلِہٖ وَسَلَّمَ نے فرمایا : اپنے ایما ن کی تجدید کر لیا کرو۔ عر ض کیاگیا : یارسولُ اللہ ! عَزَّ وَجَلَّ و صَلَّی اللہ تَعَالٰی عَلَیْہِ وَاٰلِہٖ وَسَلَّمَ ہم اپنے ایما ن کی تجدید کیسے کیا کریں ؟ فرمایا : ’’ لَآاِلٰہَ اِلَّا اللّٰہُ‘‘ کثرت سے پڑھاکرو۔(مُسْنَدُ لِلْاِمَام اَحْمَد بن حَنْبَل ج۳ ص۲۸۱حدیث۸۷۱۸)
0 Comments